اى كلام .... بس عاجبنى ؟؟

مسكينه الكلمه... مخنوقه... ممنوعه.. من حق النطق.. عماله تحوم وتدور... جوه البق.... محبوسه ما بين... اسوار الجبن وباب الحق.... محبوسه فى بق جبان... خواف... بيخاف.... من اصغر حتة جلده ف نعل الوالى... بيخاف... من شكل السياف... بيخاف ... من جندى الوالى ... لما يكح... بيخاف ... من بطة خدام الوالى... لو بحت بح... خواف...... اصله اتعلم يبقى جبان... اتعلم ان الخوف... رح يضمن له... ملو الجوف... من اقواله... لازم تبقى يا صاحبى خروف.... لجل مل تلقى حفان التبن... لجل ما تلقى حفان الفول.... لجل ما تلقى حفان جعضيض... ولا سريس... او تلقى.... حزمة جرجير.... لا زق فيها... عرق حشيش... للتحشيش.... لجل تهيص... لجل تعيش... لجل تلف... جوه الساقيه... زى التور... لجل تعيش .... فى الكون.... طرطور.... لجل ما تلقى.... هدمة خيش.. ممكن تلقى... جندى الوالى... يوم اتكرم... تلقى فى بيتك.. حتة جبنه... اوعى تقول لاء لاء... دى قريش.... فكرك راح للجبنه الرومى... دانت بتحلم... اصحى يا عم ما تقرفنيش.... لجل تعيش مرتاح... فى الكون... لازم تبقى يا صاحبى خروف... اوعى فى مره تبقى حروف... الا حروف الغزل الغالى... وانت بتمدح ... جندى الوالى... وانت بتوصف.... كرشه العالى... اوعى تقول الكرش كبير.... تبقى حمار.... رح تتبهدل.... رح تتجرجر.... رح تتعلق زى الفار... لازم تبقى يا صاحبى جبان.... يا حمار... بص لكرشه وقول دا زغنن... قد النبقه... شكله يجنن... تلقاه مد ايديه قدامك... حتبوس ايده... بعد البوسه .... اديله قفاك.... لجل ما تنعم بالنفحات... لجل ما تخرس كلمه فى بقه.... لجل ما ينسى قولة هات.... لجل ما تلقى العيش لولادك.. اوعى تخيب وتقول الحق... غيرك قالها وضاع ... صدقنى... ترجع تانى تقول الحقنى... خدها نصيحه... اوعى تزعل جندى الوالى... لو زعلته... تلقاك من بيتك منطور... تلقى الموت واقف فى الزور... ممكن يعمل لك ترتيبه.... ولا يفكر لك فى مصيبه.... تلقى حياتك... طز مفيش..... راحت منك فى الباى باى... زى ما راحت ع الطرابيش... اوعى تزعل جندى الوالى... حيخليك مرعوب... طوالى.... حيخليك الليل... بتلالى... حيسمى والدك.... زنوبه... وامك ممكن... تبقى عليش... ممكن يرميك فى التخشيبه... ولا يفكر لك فى مصيبه... او يرميك ..... فى طابور العيش... واقف دايما... ما بتمشيش... لجل تطق.... لجل تبطل... فتح البق... خدها نصيحه... غمض عينك... تاكل ملبن... تاكل لحمه... فتح عينك... خش ف ازمه.... فتح بقك... خد بالجزمه... شفت ياصاحبى... ايه يجرالك... لو جيت يوم... قلت الحق... خدها نصيحه... سيب الكلمه تلق تلق... سيبها تلفلف... جوه البق... سيبها تموت... لاحسن تاكل بالشلوت... لاءه يا صاحبى.... اسمع منى... باقيه الكلمه... مش حتموت... موش حتطق.... بكره تبص.... تلقى رموز الظلم تغور.... لما بحور الحق تفور..... لما تروس العدل تدور... بكره تبص... تلقى ضلام الليل... انشق.... تلقى جبال الخوف... تتزق.... بكره تبص... تلقى الكلمه.... نطت نطه... زى الطلقه وقالت.... لاء