٢٦‏/١١‏/٢٠٠٧

................. الاحلام ................. الاحلام . . . . كتير جدا اتكلموا عن الاحلام . . . وكتير وصفوا الاحلام .. وقد ايه هى بتمثل الواقع . . . الاحلام .. ( تمثيل مرئى عير ملموس .. لاحاسيس مسيطره على الكيان المادى ).؟ . . . لكن فى حياتنا احنا ... يعنى ايه الاحلام ؟؟ يعنى ايه نحلم ..؟ امتى نقدر نحلم ..؟ . . . لكن السؤال الاهم .. ياترى احنا اللى بنختار اننا نحلم ونحلم بأيه ؟؟ . . حياتنا فى الافراح والاحزان . والاحلام بتحاول تجسد ده . ياترى لو الانسان حزين ومش عارف يتخلص من حزنه ياترى هيكون ايه حلمه . كتير من الوقت بيكون الحلم انقاذ ومواساهووسيله كتير لما بنكون زعلانين تلاقى فى الحلم ان مشكلتك اتحلت والهم انزاح ..لكن لو الحلم ده كان عكس كده تماما وفوجئت ان الحلم اللى المفروض يواسيك كان بحزنك اكتر ويفكرك بكتير من الجراح اللى بتحاول تنساها .. طبيب نفسى فى بريطانيا كان دايما يوصى مرضى الاكتئاب بتعاطى الاقراص المنومه . ولما سأل ياترى ده نوع من العلاج ؟؟ . كانت اجابته بسيطه بس مقنعه قال / مرضى الاكتئاب دائما بتكون احلامهم عباره عن كوابيس او حتى احلام عاديه لكنها دايما بتنتهى بالاحزان وبرر الاقراص المنومه ... بانها تمنع الاحلام من التسرب الى النوم . . . ياترى هل من الاحسن .. اننا نحلم ولا اننا ننام من غير احلام ؟؟ . . . ياترى لو واحد/ه فينا كان عنده امتحان ولما نام حلم انه ماعرفش يحل وكان الامتحان سئ جداا؟؟ ....... ياترى هيكون احسن انه نام ولا انه كان يفضل صاحى؟؟ . . سؤال بسيط يايت تجاوبونى عليه . . احنا عايزين نحلم بأيه؟ . . علشان كده انا بعتبر ان الاحلام مجد شعور بسيط سقط سهوا فى حرب المشاعر والاحاسيس . . كتير الاحزان بتحاول تضمه لصفها ..وكتير الافراح بتحاول . كتير منا بقوم من النوم مفزوع وخايف .. ياترى ده تأثير الاحلام ولاخوف من التأثير المتوقع للحلم على الواقع؟؟ . .. عارفين انا الحلم ده اتكرر معايا كتير بس ياريت ماحدش يضحك؟؟ . بحلم بشجره كبيره اوى كلها عصافير بتغنى وفرحانه وبجد سعيده .. وفى يوم شافوا من بعيد عصفور جميل اوى جاى من بعيد بس الغريب انه حزين ..هتسأل زى عرفت ده فى الحلم.. هقولك ان ملامح الحزن اللى عليه لسه محفوره بجد فى جزء من وجدانى وبمجرد وصوله واستقبالهم ليه .......... يخلص الحلم ايه معنى كده ؟؟ انا نفسى مش عارف وبجد خايف من تفسير الحلم ده عارف انى طولت اوى عليكم فى موضوع ما وفيته ولو القليل القليل من حقه بس ده اللى جه فى فكرى وحبيت انى اكتبه ياريت كل صديق او صديقه يقولى عن الحلم اللى مسيطر على فكره فى الفتره الاخير . . . . . واسف على التأخير

هناك ٤٠ تعليقًا:

سلوى يقول...

الأحلام
منها الرؤيا ومنها اللي مجرد أحلام

الدكاترة بيقولوا إن الحلم شئ كويس
واللي مش بيحلم بتكون علامه مش كويسه

الأحلام موضوع كبير جدا ومبهم

وبخصوص حلمك .. مش عارفه بس بيتهئ لي
العصفور الحزين ده بيرمز لشئ

أما عن حلمي
فكنت لسه عامله بوست اسمه عالم داخل عالم
ووضعت فيه الحلم بتاعي

الحلم كان بالشيطان
وطبعا البعض نصحني بالصللاو قبل النوم
والقرآن
ودي حاجات المفروض أي مسلم بيعملها
المهم
الحلم بيجي بيجي

طولت عليك

بوستك بيفتح باب للنقاش
أحييك

خالص تحيااااااتي

samo يقول...

سلوى

غريبه اوى الحلم يكون بالشيطان
بس ده بيأكد وجهه نظرى

ياترى من الاحسن انك تنامى وتحلمى (حسب كلامك ) بالشيطان
ولا انك احسن تنامى من غير احلام ؟؟؟

داومى على الصلاه والقرأن واكيد هتستريحى

رغم انى ما عرفتش مضمون حلمك بس والواضح انه صعب كتير عليكى

اشكرك على الرد الجميل وياريت تشرفينا دوما بالزياره

خالص تحياتى (as u say )

رحــــيـل يقول...

طيب انا الوقتى اتكلم على
احلام النوم
ولا احلام اليقظه
بالنسبه لاحلام النوم انا بحس انها بتسلينى جدا اليوم اللى بصحى فيه وانا مش حلمت بحس انى فى حاجه غلط مع انى فى احلام كتير بكرها جدا جدا
اما بقى بالنسبه لاحلام اليقظه فدى عالم تانى خالص
ليه فيه جولات انا معظم حياتى بقضيها احلام بكون مستمتعه فيها بكل لحظاتى كل حاجه مش عارفه احققها بحققها فى احلامى

بس للاسف كانت قبل كده جنه بهرب ليها دلوقتى بقت نار بخرج منها وانا محروقه انى فى واقع مهزوم

اختيارك للمعانى اللى بتتكلم عنها جميل احاسيس ليها صدى جوانا فعلا

خالص تحيااااتى لك

loumi يقول...

العزيز أسامه
أنا عارفه إني مقصره معاك بس ظروف النت عندي وحشه قوي
أنا قريت البوست اللي كنت عايزني أعلق عليه وللاسف ما علقتش في وقتها بس حارجع تاني هناك وأعلق
أما موضوع الأحلام
فيقول المتخصصون أنه لايمكن أن ينام الإنسا ولا يحلم ولكن قد يتذكر الحلم عندما يستيقظ وقد لا يتذكره
وأظن أن هذا يتبع للحاله النفسيه والمشاكل والأفكارالتي تسيطر على كل منا
وأظن أنه كلما تقدم بنا العمر قل تذكرنا للأحلام وهذا ما لاحظته في نفسي
أما عن حلمك
فأظن أنك انت العصفور الحزين ولكنك تحلم بالسعاده والحياه الهانئه وأظن انك سرعان ما ستندمج مع تلك العصافير على تلك الشجرة
تحياتي لك

samo يقول...

ra7eel
عارفه .... رغم انى معرفكيش اللى من فتره بسيطه (اقصد فى عالم المدونات) الا انى بحس انى بتكلم مع حد اعرفه
اسلوبك مالوف ليا اوى بحس انه فعلا فريب من افكارى

على العموم

انا بتكلم عن الاحلام وضعفه قدام المشاعر الاخرى
من السهل اوى على الحزن انه يسلل للاحلام ويسطر عليها
كتير اوى بيقدر الخوف يتخفى فى شكل تانى ويتغلغل فى دروب الاحلام من غير اى مقاومه

عارفه احلام اليقظه كنت هاتكلم عنها فعلا لكنى فضلت ان يكون ليها موضوع خاص ( هى فعلا تستحق )

على العموم اتشرفت كتير بزيارتك

و

شكرا

samo يقول...

loumi

عارفه اسلوبك دايما بحس فيه انك فيلسوفه مش عارف ليه

بس لما اقرا كلماتك بحس انى بتكلم مه ارسطو ... افلطون ..فرويد ..ناس زى كده

بس امتى كانت الفلسفه بتحل المشاكل

مش مهم مشمهم

الاحلام

الاحلام انا مش هتكلم عنها
لانى كتبت اللى حسيت بيه كله


اما عن الزياره فانا فعلا كنت زعلان بس اعمل ايه عذرك مقبول

ربنا يكون فى عونك فعلا النت الايام دى مش تمام فعلا

هههههههه انا العصفور الحزين انا يادوب ممكن اكون الشجره اللى واقف عليها العصافير ههههه

على العموم شكرااا اوى للمجامله والمواساه الرقيقه دى

ما تغيبيش علينا

غير معرف يقول...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. If is possible add the CresceNet(www.provedorcrescenet.com) in your blogroll, I thank. Good bye friend.

oceaneyes يقول...

اولا وقبل اى حاجة انا بعتذر بشدة عن التأخر فى الرد بس ظروف الامتحانات والربكة دى ما خلصتش الا النهاردة (الخميس يعنى مش الجمعة )...

وتقريبا استنتجت ان عندك امتحانات ...عموما ربنا معاك ويوفقك ان شاء الله ...

ثانيا البوست ده بجد كتبته حلو اوى ..كنت متوقعة منك تتكلم عن الاحلام من جهة الاحزان والكوابيس و..و...و...الخ

....

بس اتفاجأت بوضع غير كدة تماما ...

صح مش باين فى مجرى الحديث بس جالى احساس مش عارفة ليه ان فى حبة تفاؤل فى النص

تفتكر دى تهيؤات ولا انا بجد صابت معايا المرة دى وحسيت صح ؟؟؟؟؟؟؟


اللى اعرفه ان الانسان بيحاول يهرب من الواقع بتاعه بالاحلام ...

ممكن وقتها فى حلمه يلاقى نفسه بيهزم مشاكله وبيحلها كلها ويصحى من النوم يحس انه متفائل وانه هايقدر يحلها ويحاول بكل طاقته انه يحلها ...


وممكن يلاقى نفسه بيهزمها ويصحى على الواقع المرير ان ده كان حلم ويتمنى ويقول "ياريت الحلم ده كان حقيقة "...


وفى اللى هايشوف فى نومه الكوابيس مش الاحلام ..وده نتيجة لتأثره الشديد ولحساسيته الاكتر بالجو اللى حواليه والمحيط اللى عايش فيه ومجتمعه ومشاكله

...


بمعنى اصح يعنى موضوع ان الحلم بيكون حل مناسب مريح لهروب الانسان من واقعه او بيكون عامل من عوامل زيادة ضيقه
وبمعنى ادق الاجابة على سؤال (ياترى احنا بنختار اننا نحلم ونحلم بإيه ؟)

...فهو موضوع نسبى مبنى على معاير غير ثانبتة ومتغيرة بتتوقف فى المقام الاول على شخصية الانسان اللى بيعانى



....


الناس بتختلف بشكل كبير اوى فى الحاجات دى

...

بيعجبنى فى كلامك حاجة مهمة جدا ...انك بتحب تأكدها بمواقف علمية وكلام حصل بالفعل ...زى حكاية الدكتور النفسانى اللى بيوصى بتعاطى الاقراص المنومة

التفسير بتاعه ممكن يكون فعلا الحل صح للمرضى دول ...واكيد هو ادرى مننا فى المواضيع دى ...

بس مش عارفة ليه حاسة انى مش بتفق معاه
....

النوم من غير احلام مش حلو ...حتى لو الاحلام هاتنتهى بحزن شديد ...

انا عن نفسى واحدة من النوع اللى بيقلق كتييييييييييير لو ما حلمتش ...

لو عدى عليا يوم واحد بدون ما احلم ..وقتها بعرف انى اكيد متضايقة بجد

....


اما عن الجزء المتعلق بإن حد يحلم باللى هايعمله فى الامتحان والكلام ده ...فده مش حقيقى لانه ببساطة بيكون نتيجة للقلق بتاع الامتحانات والخوع من شكل الامتحان وخصوصا لو كانت المادة حاجة محترمة يعنى

ما انا كتيييييييير جدا كنت حتى بشوف فى الحلم ورقة الامتحان ولما اجى اقرأ اول سؤال حد بيصاحينى ...وقتها كنت بكون مخنوقة بجد ورايحة الامتحان مأريفة بس مش بإيدى ...ده توتر طبيعى بيروح بعد ما بدخل الامتحان

....

عجبتنى اوى جملة انت قولتها

"الاحلام شعور بسيط سقط سهوا فى حرب المشاعر والاحاسيس "

بجد جملة رائعة ..ابدعت فيها فعلا

لما بتقم من النوم مفزوع فده بيكون من الخوف من الواقع المرير اللى انت عايشه واللى بيخوفك اوى لدرجة انك حلمت بيه ...لكن اكيد هو مش خوف من الحلم نفسه ولا من تأثير الحلم على الواقع ...انا ببساطة لا اعترف بتأثير الاحلام على الواقع ...

الحلم اللى انت حلمته غريب فعلا بس اكيد ليه علاقة بحاجة او منحنى معين فى حياتك ...الله اعلم ايه هو ...

بس اكيد انت عندك شك فيه على الاقل


....

اما بالنسبالى فأنا فى حلم فعلا مقلقلنى من فترة ...شوفته لحد دلوقتى مرتين ...(مرتين فى خلال اسبوعين بس )...ده غير انى فى كل مرة كنت بشوفه فيها كانت بتحصل حاجة وحشة ...وحشة اوى

....

انا مش بحب اؤمن بالخرافات ولا الخزعبلات ...بس الله اعلم ...جايز يكون تحذير ...ومهما كان قلبى مقبوض بس اكيد فى خير فى الموضوع ...ايه هو الخير ده

الله اعلم بجد !!!!!


انا اسفة عشان طولت بهبل فعلا المرة دى ...بس الموضوع بجد خصب اوى ويستاهل الكلام فيه كتير جدا كمان ...

بجانب انى بحب النقاش بعبط

:D


صحيح

حلو اوى تناسق الصور مع مضمون البوست

بجد بيعجبنى اوى فيك زوقك فى اختيار الصور


تحياتى

:)

samo يقول...

oceaneyes

انا عارف ظروف امتحاناتك
ومش انتى لوحدك كلنا عندنا البتاعه دى اللى اسمها امتحانات

المهم انت اتأخرتى فى الرد وانا اسفا كمان اتأخرت بس كان عندى امتحان مهم

عارفه انك اتكلمتى عن البوست اكتر من كلامى انا بس كلام جميل . مفسر .منسق

المهم علشان ما اطول عليكى
احنا كلنا متفقين ان مفيش حاجه اسمها تفاؤل . او . تشاؤم . لان ده حرام

انا كتبت عن الاحلام مش من وجهه نظرى المجرده عارفه ليه لانى بجد خوفت انى اخلى حد يكره الاحلام او يتهمنى انى بتكلم عن الحزن ( فى شكل احلام)

ههههههه

الاحلام هروب ؟؟
لآ .. الحلم مش هروب الحلم حلم .. امل فى ان بكره يكون احسن .. وان امبارح ننساه وما نفتكر منه غير الحلو بس


عارفه

ان الدرسات اكدت ان النوم من غير احلام اهدى واريح كتير
بس مشكلته انه ما بيدوم لاكتر من 4 ساعات

لكن وجهه نظرى انا

انا بخاف من الاحلام اوى .. بجد بخاف انى احلم بشئ مش كويس واصحى القاه اتحقق
بخاف من الاحلام .. يمكن علشان انها هروب زى ما قولتى ..بخاف انها ما تستمرش .. وبخاف اكتر انها تستمر وتنسينى اللى انا فيه من الواقع


الحلم اللى انا بحلمه .. كتير فسر لى الحلم ده بحاجات جميله واقنعنى بيها فعلا
بس مجرد انى احلمه تانى بعرف ان التفسير ده مش صحيح
انتى متخيله انك تصحى من النوم وتكونى فاكره الحلم كامل رغم انقطاعه فجأه ؟؟


انتى بيعجبنى فيك انك ديما بتنظرى للجانب المشرق ومش عاف ازاى تتجاهلى الجانب المظلم ؟؟

رغم عدم اقاعى بالتفاؤل او التشاؤم

بس انا بجد مش متشاؤم.. انا بس خايف من ايه مش عارف ولامتى برضه مش عارف ؟


انا هختم كلامى بسؤال

اتمنى تفكرى فيه كويس قبل ما تجاوبينى


ياترى احنا بنخاف من اللى جاى .. ولا بنخاف على اللى جاى ؟؟

شكراا ليكى واتمنى انى ما اكون زهقتك؟

سلام (فكرى كويس فى السؤال .. احتمال يكون موضوعى اللى جاى )

Unknown يقول...

موضوع بجد جميل و الصور المصاحبة عجبتنى اوى و اقتنعت بتفسيرك الشخصى لماهية الاحلام فى النهاية
خالص تحياتى

oceaneyes يقول...

مش عارفة !!!

بجد مش عارفة ..السؤال نفسه مستغربة منه ..

احنا ممكن نخاف من اللى جاى ..
بس ازاى نخاف على اللى جاى ؟؟؟
افرض ان اللى جاى ده حاجة مش حلوة ..حاجة تخوف ..ابتلاء مثلا ..ازاى هانخاف عليه واحنا كدة كدة بنخاف من المجهول

....


ما اعتقدش ان ممكن نخاف عليه ...لانه بالنسبالنا هايكون شىء مجهول غير معروف وزى ما قولتلك قبل كدة احنا بنخاف من المجهول ..يبقا مش هانخاف عليه ...


انا جاوبت على حسب ما فهمت من السؤال ..مش عارفة بقى ده المقصود ولا انا اللى بفهم بالشقلوب

:D



ولو هايكون ده الموضوع الجاى فهايكون حلو بجد ...لانى مش فاهماه

ههههههههه

وانا بحب الحاجات اللى مش بفهمها دى


:D


تحياتى ليك

:)

samo يقول...

عاليا حليم

اشكرك على الزياره اللطيفه دى

وعلى المجامله الجميله

واتمنى دوام الزياره

samo يقول...

oceaneyes

عارفه انتى جاوبتى الاجابه اللى انا متوقعه بجد

بس مش اللى عايزه

وباين كده انى ممكن اتكلم فى الموضوع ده

شدى حيلك فى الامتحانات

تحياتى

Selfmeaning يقول...

بوست محير جدا جدا لان تعريف الاحلام دايما
بياكد ان الحلم دا عبارة عن حاجات متخزنة فى العقل الباطن بيعرف الانسان يتخلص منها الا عن طريق الاحلام
معايا انا التعريف مش دا نافع لان تقريبا احلامى كلها بتتحقق او يعنى بحس انى بشوف الاحداث المتعلقة بيا و بكل الناس اللى اعرفهم يعنى تقريبا احلامى كلها كوابيس و ربنا يبعد عنا كلناوحش يارب و تبقى على الاقل احلامنا سعيد

samo يقول...

selfmeaning

عارف احساس غريب اوىانك تلاقى ان الكلام اللى بتكتبه بيخلى اللى يقرله هيفكر فيه ولو للحظه..... وان اللى انت بتعانيه مش احساسك لوحدك وان فيه شخص تانى بيشاركك فيه ولو كان حتى عن طريق الكتابه


شرفت المدونه وياريت تكرر الزياره

تحياتى

oceaneyes يقول...

حبيت اقول حاجة بس

...

حلو شكل البلوج كدة


اما عن الامتحانات بتاعتى فالحمد لله ...

ومستنية البوست الجديد


تحياتى

:)

samo يقول...

oceaneyes

شكراا على المجامله

وبدعيلك علشان الامتحانات

وياريت تدعوا ليا انا كمان محتاج الدعوه


البوست هيتأخر شويه
احتمال اخر الاسبوع الجاى

اديلى وشدى حيلك

banotetmasr يقول...

هههههههه

بجد بجد الموضوع جميل ومناقشتكم جميلة

عالم الأحلام ده واسع جداا ... وغامض

وكل واحد بيفسره بطريقته

وأنا لو اتفتحت في الكلام عن الأحلام هدوشك وأصدعك ...

وهزحملك الصفحةدي

بس عموما أكتر حلم اتكرر معايا إن كان في كلب بيجري ورايا طول الحلم وأنا بهرب منه

وأحيانا كان بيعضني

غالبا كان بيبقى لونه أسود مخيف

وسألت ناس كتير على تفسيره لأنه كان قلقني ... وبالذات أنه أتكرر

وللأسف عرفت تفسيره متأخر

وهو إن هناك صديق ليك بيخونك من وراك

ومش أي خيانة ... فيها قطع رقاب

بس لما عرفت التفسير كانت الفاس وقعت في الراس ... وياريتني كنت فسرته بدري شوية على الأقل كانت الأضرار هتبقى أقل بكتير

بس الحمدلله على كل شئ

سامو شكرا على المدونة الجامدة دي بجد

samo يقول...

banotetmasr

زياره جميله من انسانه رقيقه

ده اللى واضح قدامى


جميل ان البوست عجبك

وعلى العموم اتكلمى وقول اللى انتى عايزاه وما تبخليش علينا بالتطويل فى الرد
روددكم هى الوقود اللى بيدور اله الكتابه وبعض التفاؤل فى المدونه

كلب اسود ؟؟ وفسرتى الحلم ؟

وصدقتى التفسير

لا انت موضوعك كبير اوى

ممكن يكون الحلم انعكاس للواقع او حتى متأثر بالحزن والشجن والخوف و.... الخ

لكن ما يتوقعش بالغيب
مستحيل ان الحلم يقولك ان فى حد بيخونك او هيخونك

على العموم ما تزعليش نفسك لانه اكيد اللى زعلك هو اللى خسران

اتمنى اشوفك فى زيارات قريبه .. بس تتكلمى براحتك خالص

سلاااام

ارسم بالرصاص يقول...

الاحلام رسل لا غنى لنا عنها ... وكثير منا من يعطي الأحلام اكبر من قدرها .. والبعض لا يبالي .. ويحتج بكونها خرافات ..

عموما انا بأيد فكرة انها في معظمها انعكاس لما يدور ف العقل الباطن .. من احاسيس .. فرح .. ألم .. او حتى هروب ..

فعلا احيانا متلا لما بتقرب فترة الامتحانات بيتكرر معايا حلم انه امتحنت وماعرفتش اجاوب كويس او حصل اي لعبكات ..

مرات لما اكون مجهدة جدا احلم بخليط غريب من الاحلام .. لدرجة انه ممكن يكون ضحك وبكاء ف وقت واحد ..

لكن الحلم الكامل اللي دايما بفرح بيه لما أحلم بجدتي الله يرحمها ويسكنها فسيح جناته واكلمها وتكلمني ودايما احس بدفء غريب بعد مااصحى بيستمر معايا حتى لبعد مااصحى ..

سامو ... استعرضت وحللت الموضوع بشكل جميل ومرتب ... تحياتي ليك .. هايدي

samo يقول...

هايدى
عارف انى اتأخرت فى الرد
بس انا لسه مخلص امتحانات العملى يوم الخميس
جدتك الله يرحمها اكيد بتزورك علشان انتى وحشتيها وهى وحشتك
الله يتقبلها ويدخلها الجنه امين

اما عن الاحلام مش هقدر اقول اكتر من اللى قولتيه واللى الجميع رد بيه على البوست

بجد تعليقاتك بتوحشنا من فتره

حاولى ما تتأخريش علينا

تحياتى ليكى
ودعواتى للجدتك

samo يقول...

oceaneyes

اعذرى لي التأخر فى الرد
بس والله عندى مشاكل فى النت

كل سنه وانت طيبه

وكل اصدقاءنا واحبتنا واهلنا بخير


يمكن اتأخر شةيه فى البوست لظروف يطول شرحها

ادعيلى

kafrawy يقول...

لاسف

انا مبحلمش

samo يقول...

كفراوى
والله استريحت يابنى

يابختك

عالمى ازرق يقول...

عديت اقولك كل سنه وانت طيب
وعيد سعيد عليك وعلى الاسره كلها
ولى عوده اخرى

دمت بخير

oceaneyes يقول...

كل سنة وانت طيب

وكل عام وانت بخير

وعيد اتمنى انه كان سعيد بالنسبالك

.....

وعموما ربنا يوفقك فى امتحاناتك ..بس ابقا طمنا عليك

تحياتى

:)

samo يقول...

عالمى ازرق


كل سنه وانتى طيبه وسعيده و و وكل حاجه حلوه

عارف انى بتأخر فى الرد كتير بس مش بايدى

الامتحانات فى الكليه اللى انا فيها رخمه اوى

طمنينا عليك وكل سنه وانتى طيبه (متأخره )

samo يقول...

oceaneyes

كل سنه وانتى طيبه
تعرفى قد ما انا مفتقد التدوين والمدونات الا ان اكتر حاجه مفتقده فى مدونتى هى قرأه ردودك الجميله

عارف ان تأخيرى طال فى الفتره دى بس الامتحانات معذبانى شويه

الحمد لله الامتحانات الى الان كويسه
ادعيلى

رحــــيـل يقول...

سامو اخبارك ايه
كل سنه وانت طيب
ربنا معاك يارب ويوفقك فى الامتحانات

simply me يقول...

where are you d.samo

worried about you

samo يقول...

ra7eel

كل سنه وانتى طيبه

ويارب يوفقنا كلنا فى الامتحانات


ان شاء الله بكره او بعده هيكون فى بوست جديد

بس ادعولي

شكراا على الزياره

samo يقول...

بندقه

انا موجود بس الامتحانات شغلانى شويه

كل سنه وانتى طيبه وعلى العموم

كلها كام شهر ونخلص الامتحانات

take care
see you

simply me يقول...

د. سامو لازم تحطلنا شات بوكس عشان نتطمن عليك

وبعدين امتحانات ايه دى
انت بتحضر ماستر
ربنا يعينك

banotetmasr يقول...

ربنا يكرمك ياسامو على ذوقك

وربنا يوفقك في الامتحانات ياارب

samo يقول...

بندقه

صدقينى الحل مش فى الشات بوكس

المشكله انى فى كليه ما بترحمش

بس عارفه اهم شئ عندى انى لما بدخل المدونه الاقى تعليق او رساله من ناس انا بجد بشتاق لهم


واكيد انتى بتدعيلى

اوك
خدى بالك من نفسك وان شاء الله البوست الجاى هيعجبك

samo يقول...

banotetmasr

ده مش من ذوقى وبس ده والله رأيي بكل صراحه

يارب يستجيب منك

ادعيلى من قلبك علشان انا فعلا محتاج لكل دعوه علشان اخلص الكليه دى

استمرى فى الكتابه وانا هحاول اقرأ الجديد فى مدونتك كل ما اقدر

تحياتى ليكى

غير معرف يقول...

ربنا معاك ويوفقك

Unknown يقول...

كل سنة و انت طيب ، انت مختفى فين ؟ لعل المانع خير

Unknown يقول...
أزال أحد مشرفي المدونة هذا التعليق.
samo يقول...

عاليا حليم

وانتى طيبه

موجود بس كانت فى ظروف صعبه شويه
بس الحمد لله

شكراا ليكى بجد